.المئوية مأتم أم احتفالية :
———————–
كنت اضحك كتير لما اسمع عبارة لبنان الكبير بس اليوم تأكدت اني كنت غلطان بعد ما اكتشفت انو فعلا كبير وكبير كتير حتى لو كان حجمو صغير ومفلس وفقير ومخلف شلعة ولاد معظمهم بلا ضمير لكنو بعين العالم كبير ولو ليش عم تسألوني شو ما شفتو شو عم يصير وكيف زعما العالم كلن أجو يحتفلو بعيد ميلادو المية وجابو معهم مليون هدية ماكرون الحنون وترامب المجنون واردوغان الملعون والمصري المديون وغاب بشير السودان لأنو مسجون والمطار مش ملحق استقبال طيارات حاملة اشكال والوان بمشهد ما شفناه من زمان مع انو هني ذاتهم كانوا عم يهددونا بالحرمان بس كرمال عيد ميلاد لبنان صار دراكولا بابانويل وراعي البقر بطل زعلان ورمى الكرباج وحمل الصولجان وقال شبيك لبيك واشنطن بين ايديك طلوب واتمنى بس استنى في النا عندك طلب او بيرجع بيحل عليك الغضب بدك تسلمنا ابنك يلي قلبنا ضرب ومشروعنا عخشبة المقاومة صلب وخلى جيشنا من عندكم هرب واذا ما بتسلموه البلد ما تحلمو تحكموه.
وبعدك بتسألني ليش لبنان كبير ليش ما شفت عالمرفأ شو عم يصير وكيف لما حبو يحتفلو بالمئوية وضربو اسهم نارية ولعت حريقة وما قدروا يطفوها لأنو ما في ماي بالحنفية وامتدت النار
لعنبر الاسرار يلي تحول قنبلة نووية انفجرت وراحت بيروت واهلها ضحية وبثواني تغيرت خارطة بيروت وما عدنا نعرف عين المريسة من الاشرفية ويلي كان بالبور لقوا جثتو شقفة بالروم وشقفة بالجامعة الاميركية وبعلمك واحد كان عم يتمشى عالكورنيش فاق لقى بتموا نبريش وعم يخضع لعمليات جراحية ولك شو بدي خبرك عن التحقيق بالقضية حدا بيقول قضاء وقدر والتاني بيقول ايدي خفية بس كل هيدا ما لغى الاحتفال واعتبرو الشباب انو يلي صار اضرار جانبية واكتر من هيك في ناس اعتبرو الحادثة فرصة ذهبية وتقمصوا شخصية بهية لما وقفت بالبرلمان وقالت راح رفيق اعطينا السلطة يا افندي وقالوا يا حسان انت مدان يالله سلم مفتاح الدكان لسعد افندي هوي وحدو قادر يلملم اشلاء لبنان ويرجعو احسن مما كان خاصة انو هوي ابن الشهيد الكبير يلي المحكمة بقضيتو اصدرت قراراها الخطير وكشفت انو غرانديزر عياش ابن حاروف هوي المسؤول عن التفجير وانو ابو عدس مجرد خاروف وضحية تمثيلية وانو العياش كتر ما هوي غشاش عمل شبكة اتصالات مع حالو واشترى المتسوبيشي من خيالو والمتفجرات من الدكنجي يلي قبالو وعطل رادارات الموكب بواسطة صياد عمركب وشوش عالاقمار الصناعية برقوة شرعية ومن بعدها اختفى بالضاحية الجنوبية وهيك بتتسكر القضية وبعدك بتقلي لبنان مش كبير اي شوف زلمة واحد شو عمل يا زلمة ولا ابو كلبشة بزمانو يلي دوخ موسوليني ايه عياش دوخ مجلس الأمن ودول مجلس التعاون الخلجي والاتحاد الاوروبي وفوقهم دول عدم الانحياز وأكد نظرية بيكفي أنك لبناني .
لبنان يا صاحبي كبير كتير وبعدها الحفلة ما بلشت وهيدي كلها تحضيرات يمكن للعيد ويمكن لعهد جديد لأنو البوارج الطيارات ووضع اليد على المرافىء والمطارات ومستشفيات ميدانية بالعشرات كلها بتشبه التحضير لحرب اهلية وبتحقق حلم البعض بالفدرالية بعد ما ارتفع الصوت من بكركي ومن معراب نحن الأصل والباقي اغراب ولبنان الرسالة بلد الحضارات بدو يمشي على خطى الأمارات ويرجع متل زمان صندوق بريد للسفارات
بلا مقاومة بلا حرية بلا استقلال وثلاثيتو الماسية هيي
حياد-انقياد-استعباد .وكل البلاد واعديتنا بأغلى هدية اسمها دولة مدنية لا اسلام ولا مسيحية لا مارونية ولا سنية ولا شيعية
بتمد جسور السلام بينها وبين الدولة اليهودية وبيرجع لبنان متل ما كان كباريه كبير للعربان ومستشفى مجانين لكل امير خرفان ومصرف لكل يلي سرق من بلدو واجا لعندنا هربان وهيدي اللوحة ما بيقدر يرسمها الا السعدان يعني سعد والديمان .
يا صاحبي بالمئوية يا بننعي غلطة تاريخية جغرافية وبنعمل حفل تأبين لوطن عاش ومات بلا هوية يا بنعمل احتفال كبير بوطن حقق حلم التحرير وأثبت انو فعلا وطن كبير وبنقدملوا بمناسبة المئوية أجمل هدية معادلة ماسية
قوة-كرامة وحرية
المستشار قاسم حدرج
